रविवार दर आठवड्याला येतो पण आजच्या रविवारची सकाळ स्वप्नपूर्तीची होती. झोपेतुन उठल्या उठल्या मोबाईल हातात घेतला तर पहाटेपासूनच मित्रांच्या मेसेजेसने इनबॉक्स भरून गेला होता. सर्वांचा एकच मेसेज होता “अरे विशाल, सकाळ सप्तरंगला तुझा मोठा लेख आलाय” बहुतांशी जणांनी पेपरचे फोटो काढून पाठवले होते. जेवढा आनंद त्यांना मला हे सांगताना झाला असेल तेवढाच मलाही त्यांचे ऐकून झाला. खरंतर आजपर्यंत खूप काही लिहिलंय, अनेक विषय हाताळले. माझी वेबसाईट अशा विविधांगी लिखाणाने नेहमीच भरलेली असते.

मी सप्तरंगचा नियमित वाचक असल्याने कधीतरी आपलाही लेख इथे येईल असे स्वप्न पाहिले होते. अहो काय सांगू तुम्हाला; स्वप्नपूर्तीच्या आनंदात मीच लिहिलेला लेख पुन्हा दोनदा वाचून काढलाय. आपले लिखाण जास्तीत जास्त लोकांपर्यंत पोहोचावे निदान ज्यांच्यासाठी लिहिलंय त्यांच्यापर्यंत तरी पोहोचावेच असे प्रत्येक लेखकाला वाटत असते. मलाही ते वाटत होते. ते वाटणे आज सप्तरंग ने सार्थकी लावले. सप्तरंगच्या सात रंगांपैकी एक रंग होता आल्याचे आत्मिक समाधान खूप मोठं आहे जे आज मला अनुभवायला मिळाले.

आजचा हा लेख तुम्ही तर वाचाच पण  घरातील आई वडील आणि आज्जी आजोबांनाही आवर्जून वाचायला द्या. कुणाला वाचता येत नसेल, डोळ्याने दिसत नसेल तर त्यांना वाचून दाखवा. त्यांच्या आणि तुमच्या प्रतिक्रिया कमेंट बॉक्समध्ये अवश्य कळवा. बाकी वाचक म्हणून तुम्ही सर्वजण माझ्यासारख्या नवख्या लेखकाचा आत्मविश्वास वाढवत आला आहात. त्यातच आज माझ्या लिखाणाचा ‘स’काळ ‘स’प्तरंगने केलेला ‘स’म्राट ‘स’न्मान अती प्रचंड बळ वाढवणारा ठरलाय. धन्यवाद टिम सप्तरंग आणि सम्राट फडणीस सर.

विशाल गरड
दिनांक : २६ सप्टेंबर २०२१